Bu sözləri XII Qlobal Bakı Forumu çərçivəsində Trend-ə açıqlamasında Anqolanın sabiq xarici işlər naziri Manuel Dominqes Auqusto deyib.

O, Anqolanın neft və qaz istehsalçısı olduğunu qeyd edərək, onların xüsusən də bu sahədə Azərbaycanla əməkdaşlığının çox yaxşı olduğunu bildirib.

Bundan başqa, sabiq nazir Qlobal Bakı Forumundan gözləntilərini də bölüşüb:

"Bu xüsusda mən ilk dəfə Qlobal Bakı Forumunda iştirak etməyimdən çox şadam. Bakı heyrətamiz bir foruma ev sahibliyi edir. Azərbaycanlılar Azərbaycan hökumətinin, zati-aliləri, Prezident Əliyevin bu təşəbbüsü ilə fəxr etməlidirlər.

Hesab edirəm ki, bu, beynəlxalq münasibətlər üçün mühüm forumdur. Xüsusən ona görə ki, iştirakçılar müxtəlif ölkələrdən və regionlardan hökumətdə və beynəlxalq təşkilatlarda olmuş çox mühüm insanlardır".

"Hesab edirəm ki, buradakı müzakirələr dünyanın üzləşdiyi əsas problemlərin həllinə töhfə verə bilər. Xüsusən də Avropada, Ukraynadakı müharibə, həmçinin Yaxın Şərqdə Qəzzadakı vəziyyəti qeyd etməliyəm.

Biz bir daha Azərbaycan hökumətini təbrik etməliyik ki, dünyanın müxtəlif bölgələrindən olan fərqli insanların Bakıda görüşməsinə və bəşəriyyət üçün olduqca əhəmiyyətli problemlərin müzakirə edilməsinə şərait yaradıb", - sabiq nazir vurğulayıb.

Qeyd edək ki, XII Qlobal Bakı Forumu 13-15 mart tarixlərində keçirilir. Forum Nizami Gəncəvi Beynəlxalq Mərkəzi tərəfindən "Dünya düzəninin yenidən düşünülməsi: Çağırışların fürsətə çevrilməsi" şüarı altında təşkil olunub.

Tədbir çərçivəsində qlobal geosiyasi dəyişikliklər, çoxtərəfli yanaşma, qlobal səhiyyə böhranı, bərpa və dünyanın regional sabitliyi, COP29 və digər vacib qlobal məsələlər müzakirə olunacaq.

Forum 60-dan çox ölkədən 300-dən artıq dünya liderini bir araya gətirəcək. Onların sırasında həmçinin 25-dən çox sabiq prezident, 15-dən çox keçmiş baş nazir, BMT və beynəlxalq agentliklərin təxminən 10 rəhbəri, həmçinin 25-dən çox keçmiş nazir və nazir müavini yer alacaq. Son.az