Mlli.Az xəbər verir ki, bu barədə Audiovizual Şuranın Kommunikasiya sektorunun müdiri Taleh Quliyev APA-nın sorğusuna cavab olaraq bildirib.

Onun sözlərinə görə, çünki operator hər hansı televiziya kanalını retranslyasiya edirsə, bu istiqamətdə hüquq əldə edibsə, adi qaydada bu son istifadəçilərə (abonentlərə) aid olur.

"İctimai iaşə obyektlərində retranslyasiya isə ayrıca müqavilə ilə tənzimlənir. Burada məsuliyyəti ictimai iaşə obyekti deyil, ona retranslyasiya xidmətini təqdim edən operator daşımalıdır, çünki müqavilə bağlananda operator həmin iaşə obyekti ilə həmin obyektin xarakterinə uyğun müqavilə bağlamalıdır", - Taleh Quliyev ictimai iaşə obyektlərində pirat yayım vasitəsilə futbol üzrə klublararası dünya çempionatının yayımlanmasına münasibət bildirərkən deyib.

Audiovizual Şuranın rəsmisi qeyd edib ki, Azərbaycan Respublikası ərazisində futbol üzrə klublararası dünya çempionatının yayımı həmin çempionatın yayımını müstəsna yayım hüququ ilə əldə etmiş yayımçılar tərəfindən həyata keçirilirdi. Belə ki, ictimai iaşə obyektlərində bu çempionatın yayımı həmin ictimai iaşə obyekti ilə Audiovizual Şura tərəfindən lisenziya verilmiş platforma operatoru arasında bağlanmış müqaviləyə uyğun olaraq həmin operator tərəfindən retranslyasiya edilə bilərdi: "Əgər hər hansı ictimai iaşə obyekti Audiovizual Şura tərəfindən verilmiş lisenziyaya malik olmayan platforma operatoru ilə müqavilə bağlamadan retranslyasiya xidmətini özü təşkil edirsə, bu halda qanunsuz sahibkarlıq fəaliyyəti ilə məşğul olmağa - sahibkarlıq fəaliyyətinin həyata keçirilməsi üçün lisenziya tələb olunduğu hallarda belə lisenziya almadan sahibkarlıq fəaliyyəti ilə məşğul olmağa - görə Audiovizual Şura tərəfindən aidiyyəti qurumlara müraciət olunur".

Taleh Quliyev diqqətə çatdırıb ki, pirat yayımlara qarşı mübarizə sahəsində son illər Audiovizual Şura tərəfindən mühüm addımlar atılmaqdadır: "İlk növbədə xaricdən internet üzərindən yerli bazara daxil olan operatorlara qarşı aidiyyəti qurumlarla birgə müvafiq tədbirlər görülüb və 20-ə yaxın xarici operatorun internet informasiya ehtiyatlarına müraciəti məhkəmə qərarı ilə məhdudlaşdırılıb".

Taleh Quliyev onu da qeyd edib ki, Audiovizual Şuradan lisenziya alaraq fəaliyyət göstərən operatorların paketlərində həmin operatorun retranslyasiya etməyə hüququ olmayan televiziya kanallarının yayımlanmasının qarşısının alınması istiqamətində də zəruri işlər aparılır.

Növbəli şəkildə aparılan monitorinqlər nəticəsində 20-dən çox platforma operatoruna "Media haqqında" Qanunun 32.4-cü maddəsinin tələbinin (Platforma operatoru onunla xarici audiovizual yayımçı və ya onun adından müqavilə bağlamaq səlahiyyəti olan şəxs arasında xarici audiovizual yayımçıların proqramlarının retranslyasiyasına dair bağlanmış müqavilənin surətini Şuraya təqdim etməlidir) pozulması faktına görə barəsində inzibati xəta haqqında protokollar tərtib olunaraq müvafiq rayon (şəhər) məhkəmələrinə təqdim olunub, məhkəmələr tərəfindən həmin operatorların hər biri 5000 manat məbləğində cərimə edilib. Hazırda da bu proses davam edir. Son 1 ayda daha 3 operator barəsində inzibati xəta haqqında protokollar tərtib olunaraq müvafiq rayon (şəhər) məhkəmələrinə təqdim olunub.