Son.az xəbər verir ki, C-130 təyyarələri ABŞ istehsalıdır və Lockheed Martin şirkəti tərəfindən hazırlanıb. Bu model ilk dəfə 1956-cı ildə ABŞ Hərbi Hava Qüvvələrinin inventarına daxil edilib və bu günə qədər dünyada 70-dən çox ölkə tərəfindən istifadə olunur. Şirkətin məlumatına görə, indiyə qədər 2.500-dən çox C-130 təyyarəsi istehsal edilib.

C-130-lar əsasən hərbi personalın və iri ölçülü yüklərin daşınmasında istifadə edilir. Təyyarə helikopter, zirehli texnika və digər ağır avadanlıqları daşıya bilir. Bundan əlavə, bu model meşə yanğınları ilə mübarizə zamanı suya müdaxilə təyyarəsi, həmçinin hava ambulansı kimi də istifadə olunur.

Amerika Hərbi Hava Qüvvələrinin məlumatına görə, təyyarə heyəti daxil olmaqla 92 sərnişin, 72 tam təchizatlı əsgər və ya 64 paraşütçü daşıya bilir.

Gürcüstanda qəzaya uğrayan təyyarənin C-130E variantı olduğu bildirilir.

Texniki göstəricilər

Uzunluğu: 29 metr

Qanad açıqlığı: 40 metr

Boş çəkisi: 34 ton

Maksimum uçuş çəkisi: 79 ton

Uçuş məsafəsi: təxminən 4.000 km

Havada qalma müddəti: 10 saata qədər

Dörd pervaneli turboprop mühərriklə təchiz edilib.

Türkiyənin inventarında neçə C-130 var?

TRT Haber-in məlumatına görə, 1964-1991-ci illər arasında Türkiyə Hərbi Hava Qüvvələrinin inventarına 2 fərqli modeldə ümumilikdə 13 C-130 təyyarəsi daxil edilib.

2012-ci ildə isə Suudi Ərəbistan Hərbi Hava Qüvvələrinin inventarından təmir olunmuş 6 ədəd C-130E alınaraq istifadəyə verilib.

Hazırda Türkiyənin inventarında 19 C-130B/E modeli olduğu bildirilib. Təyyarələr Kayseridə yerləşən 222-ci Filo Komandanlığında xidmət edir və hər 6 ildən bir texniki baxışdan keçirilir. Modernizasiya proqramlarından sonra bu modellərin 2040-cı ilə qədər xidmətdə qalacağı gözlənilir.

Bundan əlavə, Müdafiə Nazirliyi oktyabr ayında İngiltərədən 12 ədəd C-130J Super Hercules təyyarəsi alınacağını açıqlamışdı.

Keçmişdə baş verən bəzi C-130 qəzaları

1982-ci ildə ABŞ Hərbi Hava Qüvvələrinə aid C-130 Erzurum-İncirlik uçuşu zamanı qəzaya uğradı və göyərtədəki 27 nəfərin hamısı öldü.

2014-cü ildə Cezayir Hərbi Hava Qüvvələrinə məxsus C-130 qəzaya uğradı, 78 nəfərdən yalnız biri sağ qaldı.

2021-ci ildə Filippin Hərbi Hava Qüvvələrinə aid C-130 eniş zamanı qəzaya uğradı, 53 nəfər həyatını itirdi. Son.az