Son.az lent.az-a istinadla mərhum qəzəlxan haqqında məlumat verir.

- Arif Buzovnalı kimdir?

Arif Buzovnalı (Əliyev Arif Rauf oğlu) 6 sentyabr 1972-ci ildə Bakının Buzovna qəsəbəsində ziyalı ailəsində anadan olub. Azərbaycan şairi, qəzəlxanı, tədqiqatçısı, şerşünası və ədəbi məclis təşkilatçısıdır. O, klassik poeziya ənənələrini müasir düşüncə ilə birləşdirən nadir qələm sahiblərindəndir.

- Arif Buzovnalı harada təhsil alıb?

Arif Buzovnalı 1979-1989-cu illərdə Buzovna qəsəbəsindəki 26 saylı orta məktəbdə təhsil alıb.

- Arif Buzovnalının ədəbi yolunun başlanğıcı nə vaxtdan götürür?

Arif Buzovnalının poeziyaya gəlişi gənclik illərinə təsadüf edir. İlk şeirlərini 1980-ci illərin sonlarında yazmağa başlayıb. 1987-ci ildə "Pioner" jurnalına göndərdiyi şer dərc olunmasa da, iki il sonra, 1991-ci ildə həmin şer artıq "Azərbaycan Gəncləri" qəzetində yer alıb. Bu fakt şairin ilk uğurlu addımı sayılır.

- Arif Buzovnalı hansı mühitdə formalaşdı?

Arif Buzovnalı Bakıda və Abşeronda fəaliyyət göstərən ənənəvi ədəbi məclislərin fəal üzvü olub. Xüsusilə "Füzuli" ədəbi məclisi, "Məcməüş-şüəra" qəzəl məclisi, müxtəlif poeziya ocaqları onun yaradıcılıq atmosferini formalaşdırıb. Bu məclislər şairin qəzəl ənənəsinə bağlılığının əsas mənbələrindəndir.

- Arif Buzovnalının hərbi və döyüş yolu yaradıcılığına necə təsir göstərib?

Arif Buzovnalı 1990-1992-ci illərdə Sovet ordusunda xidmət edib. 1993-cü ildə ali təhsilə başlamaq əvəzinə könüllü olaraq Qarabağ cəbhəsinə yollanıb və Əzizbəyov adına Könüllülər Batalyonunda 1994-cü ilin mayınadək döyüşüb. Bu dövr, onun şerlərindəki iradə, təvazö, vətənpərvərlik və "şəxsi faciədən ümumi qəhrəmanlığa yüksəlmə" motivlərinin əsas qaynaqlarındandır.

- Arif Buzovnalının ən böyük ədəbi uğurları hansılardır?

Arif Buzovnalının adı təkcə ölkədə deyil, regionda da tanınır. O, 2003-cü ildə Təbrizdə "Şeri-tənz" Beynəlxalq şer müsabiqəsinin, 2010-cu ildə Urmiyada "Rəzəvi" Beynəlxalq Şer Festivalının qalibi olub.  2011-2016-ci illərdə isə eyni festivalda türkdilli şer üzrə münsif, 1-ci və 2-ci "Nəsimi  Şer, incəsənət, mənəviyyat" festivallarında müəllif və aparıcı, 2014-2021-ci illərdə AzTV-də "Məclisi-Üns" verilişinin daimi iştirakçısı olub.

Bundan əlavə, şairin əsərləri Türkiyə, İran, Rusiya, Ukrayna və digər ölkələrin mətbuatında da çap olunub.

- Arif Buzovnalı hansı qurumlara rəhbərlik edib?

Arif Buzovnalı 2011-ci ildə Azərbaycan Yazıçılar Birliyinin üzvü, 2016-da Xəzər Yazıçılar Birliyinin sədri, 2017-də "Poeziya Klubu"nun rəhbəri, 2022-ci ildə isə AYB "Füzuli" komissiyasının sədri olub.