Son.az bununla bağlı xarici KİV-ə istinadən xəbər verir.

Bu proseslə bağlı əməkdaşımızın apardığı araşdırmanı təqdim edirik. 

Əvvəlcə, onu deyək ki, 74 metrlik "Vselennaya" adı altında olan yaxtanın əvvəllər Rusiyanın keçmiş prezidenti, hazırda Rusiya Təhlükəsizlik Şurasının sədr müavini olan Dmitri Medvedyevə məxsus olması qeyd edilir. Hazırda sözügedən yaxtanın adı dəyişdirilərək "Casino Royale" qoyulub və ABŞ-a doğru hərəkət edir.

Məlumata görə, yaxta, Ceyms Bond filmlərində tanınan bu adla, Rusiya sularını tərk edərək, Gibraltar və Madeira üzərindən keçərək, ABŞ-ın Florida ştatındakı North Palm Beach bölgəsində yerləşən US PBI limanına istiqamətlənib. Yaxtanın marşrutu açıq transponder vasitəsilə izlənilə bilir.

Bəs Dmitri Medvedyev haqqında nələri bilirik?

O, Rusiya siyasətində mühüm rol oynamış hüquqşünas və dövlət xadimidir.

Erkən Həyatı və Təhsili

Dmitri Medvedyev

Dmitri Anatolyeviç Medvedyev 1965-ci il sentyabrın 14-də Sovet İttifaqının Leninqrad şəhərində (indiki Sankt-Peterburq) anadan olub. O, Sankt-Peterburq Dövlət Universitetində hüquq təhsili alıb və 1990-cı ildə mülki hüquq sahəsində doktorluq dərəcəsi qazanıb. 1990-1999-cu illərdə universitetdə müəllimlik fəaliyyətini davam etdirib.

Siyasi Karyerası

Medvedyevin siyasi karyerası 1990-cı illərin əvvəllərində Sankt-Peterburq meriyasının Xarici Əlaqələr Komitəsində məsləhətçi kimi başlayıb. Burada gələcək Rusiya prezidenti Vladimir Putinlə tanış olub və onunla sıx əməkdaşlıq edib. 2000-ci ildə Putin prezident seçildikdən sonra, Medvedyev onun prezident seçki kampaniyasına rəhbərlik edib və daha sonra prezident administrasiyasında müxtəlif vəzifələrdə çalışıb.

2005-ci ildə birinci baş nazir müavini təyin olunub və 2008-ci ildə Rusiya prezidenti seçilib. 2012-2020-ci illərdə Rusiyanın baş naziri vəzifəsində çalışıb. 2020-ci ildən etibarən Rusiya Təhlükəsizlik Şurası sədrinin müavini vəzifəsini icra edir.

Şəxsi Həyatı

Medvedyev 1993-cü ildən Svetlana Medvedyeva ilə evlidir və cütlüyün İlya adlı bir oğlu var.

İndi keçək yenə də yaxta mövzusuna. Yaxtanın keçmişi və sahibliyi

"Vselennaya" yaxtası 2018-ci ildə Hollandiyanın Damen Yachting şirkəti tərəfindən inşa edilib və Kayman adalarında qeydiyyatdan keçmiş "Southerner" adlı ofşor şirkətə məxsusdur. 2020-ci ildə yaxta Soçi limanında 72 gün keçirmiş, 2022-ci ildə isə İtaliyanın Imperia limanını tərk edərək, İstanbul vasitəsilə yenidən Soçiyə qayıdıb.

"Proyekt"in məlumatına görə, yaxtadan Dmitri Medvedyevin oğlu İlya Medvedev və keçmiş enerji naziri, milyarder İqor Yusufovun oğlu Maksim Yusufov istifadə ediblər. İki mənbə, yaxtanın əsl sahiblərinin Yusufov ailəsi olduğunu, lakin Medvedyevin də yaxtadan istifadə etdiyini bildirir. Yaxtada Medvedev üçün xüsusi kabinet və rabitə sistemləri qurulub. Rusiya sularında olduğu zamanlarda yaxta tez-tez Rusiya Hərbi Dəniz Qüvvələrinin gəmiləri tərəfindən müşayiət olunub.

Yeni yaxta: "Hurry Up"

Rusiya mediasında verilən məlumatlara əsasən deyə bilərik ki, Medvedyev heç vaxt yaxtasız qalmayıb. 2024-cü ildə onun etibarlı şəxsləri tərəfindən Böyük Britaniyada yerləşən Princess Yachts tərəfindən inşa edilən 4,3 milyon dollar dəyərində "Hurry Up" adlı yeni yaxta alınıb. Bu yaxta, Medvedyevin universitet yoldaşı İlya Yeliseevlə əlaqəli olan Milli Dəniz Proqramlarını Dəstəkləmə Fondu tərəfindən alınıb. Yeliseev, Medvedyevin maliyyə işlərini idarə edən şəxs kimi tanınır.

Medvedyevin yaxta kolleksiyasına əlavə olaraq, 2017-ci ildə İtaliyanın Monte Carlo Yachts tərəfindən inşa edilən 29 metrlik "GV" yaxtası və həyat yoldaşı Svetlananın şərəfinə adlandırılmış 32 metrlik "Fotiniya" yaxtası daxildir. "GV" yaxtasının dəyəri 5 milyon dollar, "Fotiniya"nın isə 11 milyon dollar olaraq qiymətləndirilir. /Lent.az