Evində "pitiminutka" olanlar DİQQƏT: Bunları mütləq bilməlisiz

Digərləri 12 Noy 2025 11:45:00 52 0

Havaların soyuması ilə təbii qazdan istifadə artıb, lakin bu, dəm qazından zəhərlənmə riskini də yüksəldir. Xüsusilə "pitiminutka" suqızıdrıcısı hamam otağında yerləşən mənzillərdə bu kimi zəhərlənmə hallarına daha çox rast gəlinir.

Bəs dəm qazı necə yaranır?

Son.az xəbər verir ki, dəm qazı adətən yanma prosesi tam başa çatmadıqda əmələ gəlir və rəngsiz, dadsız, qoxusuz olduğundan insanlar onu hiss edə bilmir. Qanımızdakı hemoglobinə bağlanan bu qaz oksigenin toxumalara çatmasına mane olur, nəticədə boğulma və ölüm riski yaranır.

Mövzu ilə bağlı təhlükəsizlik eksperti Elmar Nurəliyev bildirib ki, havalar soyuduqca təbii qazdan istifadə edən abonentlərin sayı üç-dörd dəfə artır və bu, dəm qazı zəhərlənməsi riskini yüksəldir. Ekspertin sözlərinə görə, evdə təhlükəsizliyi təmin etmək üçün pəncərələri daim açıq saxlamaq, evə girəndən sonra havalandırmaq və qaz cihazlarının yanmasını düzgün təşkil etmək vacibdir. Tüstü bacaları və havalandırma sistemi ildə ən azı iki dəfə yoxlanmalıdır. Hamamxananın qapısı xaricə açıq olmalı, qapının altındakı dəliklər vasitəsilə otağa hava daxil olmalıdır:

"Dəm qazı zəhərlənməsinin əsas səbəbi cihazların düzgün işləməməsi və yanma üçün kifayət qədər oksigenin olmamasıdır. Bu zaman təhlükəli karbon monoksid əmələ gəlir. Əgər otaqda 0,1% karbon monoksid yaranarsa, 7-30 dəqiqə ərzində insanın həyatı üçün təhlükə yaranır".

Sözügedən məsələ ilə bağlı Fövqəladə Hallar Nazirliyindən qeyd edildi ki, dəm qazı ölüm təhlükəsi yaradır:

"Bu təhlükədən qorumaq üçün:

- qaz cihazı saz və standartlara uyğun olmalı;

- cihaz olan məkanın hündürlüyü 2 metr 20 santimetrdən az olmamalı;

- havaçəkən sistem işləməli, nəfəslik açıq olmalı;

-hamam otağında ventilyasiya borusu, qapının aşağısında dəliklər olmalı;

-tüstü bacaları ildə iki dəfə təmizlənməlidir.

Yadda saxlayın! Dəm qazı iysizdir, hiss edilmir!

Ondan zəhərlənmənin əlamətləri: baş ağrısı, baş gicəllənməsi, ürək bulanması, halsızlıq.

Dəm qazından zəhərlənmiş insanı təmiz havaya çıxarıb, nəfəsalmasını çətinləşdirən geyimlərdən azad etmək, təcili tibbi yardım çağırmaq lazımdır!".

Aysel Əkbər Son.az