Hava dəyişir Əhaliyə xəbərdarlıq

Digərləri 08 Avq 2025 11:30:00 61 0

Uzun müddət davam edən anomal istilərdən sonra havaların yavaş-yavaş soyuyacağı, yaxın günlərdə isə yağışlı və küləkli havaların başlayacağı proqnozlaşdırılır. Belə iqlim dəyişiklikləri adətən insanların həm psixoloji, həm də bioloji sağlamlığına təsir edir, xəstəliklərin, xüsusilə soyuqdəymə hallarının artmasına səbəb olur.

Bu keçid dövründə insanlar nələrə diqqət etməlidirlər?

Son.az xəbər verir ki, globalinfo.az-a danışan tibb elmləri doktoru, professor Adil Qeybulla bildirib ki, insanların iqlim təlatümlərindən qorunmaq üçün kifayət qədər imkanlar var.

Onun sözlərinə görə, ən azından insanların evləri, kondisionerləri və digər mühafizə vasitələri mövcuddur, buna görə də həm soyuq, həm də isti havalardan müvafiq şəkildə qorunmaq mümkündür:

"Lakin əsas məsələ ondan ibarətdir ki, biz artıq Yer kürəsinin istilik tənzimi mexanizmlərinin pozulması, yəni qlobal istiləşmə kimi tanınan ciddi bir proseslə üz-üzəyik. Dünyanın müxtəlif regionlarında iqlimin kəskin dəyişməsi müşahidə olunur və bu dəyişikliklər relyefə də təsir göstərəcək. Belə davam edərsə, hesab edirəm ki, insanlar buna adaptasiya olmalıdırlar. Tarix boyunca yay isti, payız soyuq və küləkli, qış isə soyuq, şaxtalı keçib. Biz artıq fəsil dəyişmələrinə alışmışıq. Sadəcə, çox adam isti havaları xoşlamır. Ancaq unutmamalıyıq ki, Günəş olmasa, bu qalaktikada, bizim Günəş sistemi planetlərində həyat tamamilə dayanar".

Ekspert bildirib ki, Yer kürəsində həyat günəş enerjisindən asılıdır:

"Bu baxımdan ekvator ətrafında insanlar 60 dərəcə isti altında belə yaşayırlar və buna öyrəşirlər. Biz də bu cür təlatümlərə alışmalıyıq. İnsanlarda iqlim dəyişikliklərinin törətdiyi təsirlərə gəldikdə isə, əsas məsələ baş verən prosesləri düzgün dərk etmək və onlara təbii yanaşmaqdır. Əks halda, prosesləri qəbul etməyən və ya onlara uyğunlaşmağa çalışmayan şəxslərdə adekvat olmayan reaksiyalar - stres, nevroz və digər psixoloji problemlər ortaya çıxır".

Mənbə: milli.az

08 Avq 2025 14:05

Hava dəyişir Əhaliyə xəbərdarlıq

Siyahının davamı